Dili, 06 Maiu 2026 (Media Democracia)- Membru FALINTIL–Forsa Defesa Timor-Leste (F-FDTL) partisipa iha Konferénsia Finál Planeamentu bá Ezersisíu Multinasionál Trident Resolve.
Konferénsia ne’e realiza husi loron 04 to’o 06 Maiu 2026, iha Jakarta–Banten, Indonésia, iha kuadru ASEAN Defence Ministers’ Meeting-Plus Expert Working Group on Humanitarian Assistance and Disaster Relief (ADMM-Plus EWG on HADR).
Tuir informasaun ne’ebé Media Democracia asesu iha portál ofisiál Defeza katak Delegasaun husi F-FDTL ne’e lidera husi Xefe Seksaun Kooperasaun Sivil-Militár Tenente-Koronel Laurentino Gusmão, akompaña husi 2.º Komandante Komponente Naval, Kapitaun Fragata Grad Nicolau Sousa, no Xefe Departamentu Operasaun Komponente Terrestre, Major Nogueira Dias Quintas “Laranjina”.
Iha konferénsia ne’e partisipasaun F-FDTL nian iha importánsia estratéjika aas, tanba permite atu aprofunda diskusaun sira kona-bá kontribuisaun Nasionál iha Ezersisíu Trident Resolve, liu-liu iha área prioritária sira hanesan Asisténsia Umanitária no Alíviu Dezastre (HADR), apoiu médiku Militár no siberseguransa.
Enkuantu, ezersisíu Trident Resolve sei realiza husi loron 21 to’o 26 Setembru 2026 iha provínsia Banten, Indonésia, ho partisipasaun husi Estadu-membru ASEAN no nasaun parseiru sira iha kuadru ADMM-Plus EWG.
Ezersisíu ne’e, nia objetivu atu reforsa interoperabilidade, hadi’a koordenasaun multinasionál no hasa’e kapasidade resposta konjunta bá situasaun dezastre naturál no emerjénsia kompleksa sira, inklui mós komponente médiku-militár no siber.
Aleinde ne’e, iha marjen konferénsia, delegasaun Timor-Leste halo enkontru bilateral ho komisaun organizadora, ne’ebé ko-prezide husi Singapura no Nova Zelândia, no mós ho nasaun anfitriaun, Indonésia, ho objetivu atu identifika oportunidade konkretu bá partisipasaun ativa no kontribuisaun F-FDTL iha Ezersisíu refere.
Konferénsia ne’e hala’o iha ambiente kooperasaun di’ak, diálogu konstrutivu no reforsu relasaun amizade no konfiansá mútua entre Estadu partisipante sira.
Entretantu, estadia iha Jakarta ne’e delegasaun F-FDTL hetan apoiu signifikativu husi Adidu Defeza Timor-Leste bá Indonésia, Koronel Renilde Guterres Corte Real e Silva ho nia ekipa, liu husi fornesimentu informasaun relevante, aranjamentu alojamentu no transporte, ne’ebé kontribui bá susesu partisipasaun delegasaun iha konferénsia ne’e.
Husi : Estefánia Excar
Foto: Média F-FDTL