Dili, 6 Maiu 2026 (Media Democracia)- Komisaun C Parlamentu Nasionál ne’ebé trata Asuntu Finansas Públikas aprova ona kalendáriu diskusaun ba projetu Lei Rejime Jerál Taxa Administrativu ho prezensa deputadu nain 8.
Presidente komisaun C, Cedelígia Faria dos Santos hatete, lei foun ne’e sei regula espesífiku taxa sira iha Administrasaun Públika no sei abranje seitór barak.
“Ohin ami halo apresiasaun ho aprovasaun ba kalendáriu lei foun kona-ba Rejime Jerál Taxa Administrativu, ba oin ita sei iha lei ida ne’ebé regula espesífiku kona-ba ita nia taxa sira, tanba aplikasaun taxa ne’e sei abranje área barak, Komisaun C sei realiza audiénsia ho entidade oioin, lei ne’e bainhira aplika, nia taxa sei abranje ba parte barak tebes.” Dehan Prezidente Komisaun C PN ba jornalista sira iha diskusaun parlamentu 06 Maiu 2026
Nia dehan, Komosaun C sei halo audiénsia ho Vise-Primeiru Ministru ba asuntu ekonomia, Ministériu Petróleu, Ministériu Saúde Ministériu Obras Públika no Ministériu seluk tanba Ita hatene EDTL mak rekolla reseita barak, entaun sei bolu hotu entidade sira ne’e.
Cedelígia informa, kona-ba setór saúde maske oras ne’e gratuita, futuru bele iha taxa ba kazu espesífiku Posibilidade ba oin, hanesan ita ba uza mákina balun iha ospitál sira, sei kona mós taxa.
“Lei ne’e sei fó dalan ba Munisípiu atu rekolla taxa, Partisipa mós Munisípiu sira tanba taxa sira ne’e mós bele hala’o iha Munisípiu kona-ba atividade sira, inklui tera sira nian, Lei ne’e la tama ba impostu. Impostu ne’e baibain ami bolu IVA. Governu sei submete bainhira impostu tama mós, hakarak ka lakohi ita nia komunidade tenke prontu tanba sei afeta ba konsumidór sira.” Nia adianta
Nia afirma katak, depois tinan 20 tama ba Restaurasaun, tenke tau ona sasán sira ne’e iha fatin para atu bele aumenta mós reseita ba governu rasik, tanba dala barak reseita doméstika Timor nian la to’o atu kobre saláriu fundamentu.
Komisaun C rekoñese katak iha problema ho implementasaun taxa ne’ebé eziste ona hanesan iha Munisípiu sira, tanba edifísiu balu tau hela taxa atu selu arrendamentu, taxa ba saláriu, maibé balu la halo tuir.
“Lei iha maibé bainhira implementasaun iha terrenu ita la duun tau kontrolu másimu, ida ne’e mós fó impaktu, ha’u hanoin lei ida ne’e atu aumenta taxa ne’ebé durante ne’e seida’uk inklui, bainhira aprova, nia abranjénsia sei luan liu tan, sei iha limitasaun, agora ita sei tau limitasaun hela ba buat balun de’it tanba ita foin ukun-an no saláriu povu nian mós sei ki’ik.” Nia dehan
Tanba agora tama ona ba tinan 2026, Governu tau ona atensaun ba sasán sira ne’e, hafoin aprova kalendáriu, semana oin Prezidente Komisaun sei lori projetu lei ba jeneralidade iha Plenária, bainhira aprova ona jeneralidade iha Plenária, Komisaun sei kontinua fila-fali ba espesialidade.
Reportajen : Leozalia/Juliana
Foto : Leozalia