Dili, 07 Maiu 2026 (Media Democracia)-Prezidente Komisaun Rekrutamentu ba Kandidatu Estudante Akademia Militár 2026, Nuno Corvelo, hateten kandidatu hamutuk nain 214 submete ona ba prova kulturál.
Nia informa, total aplikante iha etapa primeiru hamutuk na’in 320, maibé iha na’in 214 de’it mak liu faze apuramentu no ohin loron tuir ona prova kulturál.
“Agora sira ne’ebé liu ne’e submete mai prova kulturál, prosesu ida ne’e importante atu haree se kandidatu sira kumpre rekizitus molok tama ba etapa tuir mai,” dehan prezidente Komisaun Rekrutamentu Nuno ba jornalista sira hafoin observa direta prova kulturál iha Fakuldade Enjeneria Siénsia Teknolojia, Hera Kuarta ne’e (06/05/26).
Nia informa, prova kulturál ne’e kandidatu sira pasa mak foin tuir fali teste matéria tolu hanesan matemátika Portugues no Ingles.
“Prova ida ne’e sei determina se mak bele kontinua ba etapa tuir mai. Komisaun mos define kriteria klaru kona-ba altura no idade atu garante kandidatu sira iha kondisaun atu tuir treinamentu, ba mane altura la bele menus husi 1.64 metru no ba feto 1.60 metru.” Nia dehan
Nia afirma, kandidatu estudante akademia militar konjuntu ne’e tenke idade husi 17 to’o 20 no iha fulan dezembru agora mak atinji ona tinan 21 ne’e labele ona, nune’e komisaun sei haree idade produtivu sira atu nune’e bele dezenvolve iha karreira militár.
Nuno haktuir, prosesu ne’e komisaun mós identifika katak kandidatu barak la liu selesaun tanba problema dokumentus, tanba maioria kandidatu sira la aprezenta dokumentus konprovativu kona-ba sira nia formasaun edukasaun ba désimu segundu anu.
Prezidente komisaun ne’e afirma, komisaun sei kontinua ho faze selasaun tuir mai, kandidatu sira ne’ebé liu hotu prosesu sei hetan oportunidade atu tama no tuir estudu iha Akadémia Militár.
“Prosesu ida ne’e hanesan ha’u dehan ona rigor no laiha famíliarizmu, prosesu selesaun ida ne’e la haree nia ne’e jeneral ka ofisial no veteranu nia oan, tanba ami komisaun iha komprimisiu atu lori prosesu ne’e too ho transparante.” Nia hatete
Nuno Corvelo realsa, prosesu selesaun ne’e la’o ho rigór no transparante.
” Agora faze prova kultural, kuandu iha ne’e mak sira laliu sira sei elemina hodi labele hakat ba faze tuir mai.no faze tuir mai barak hatoo katak kandidatu sira ne’ebé pasa iha prova kultural sei pasa ba teste mediku no fiziku, no too loron sanulu sira ba iha akademia militar iha Aileu. Tanba ita sei iha selebrasaun ema na’in -60 iha faze dahuluk akademia militár konjunta.” Dehan Nia
Iha fatin hanesan kandidata estudante akademia militár konjunta 2026, Devia de Jesus Amaral sente kontente tanba bele konkore iha vaga akademia militar konjunta no iha esperansa hakarak sai duni militar.
“Hau husi Munisípiu Aileu, hau nia esperansa katak, sente kontente bele konkore iha akademia militar ida ne’e no ba oin mak liu, hakarak sai militár hodi defende no ita nia rai, sai militar ne’e mehi dezde uluk kiik kedas.” Dehan Dévia ba jornalista sira hafoin remata prova kulturál
Nunee mos Samuel Nilton Soares ne’ebé iha esperansa boot atu sai militár, maske sei iha lakon no manan la’ós sai kestaun ba nia, maibé nia senti motivadu tanba nia iha espíritu nasionalizmu nu’udar Timor oan tenke kontribui ba Ita-Nia rai.
Reportajen : Estefania Cardoso
Foto : Estefania Cardoso