Dili, 12 Juñu 2026 (Media Democracia)– Aman nu’udar responsabildade boot ba familia, Iha idade 74 ona, Matias de Jesus deside buka moris liu husi Ai-Leba hodi fa’an modo hanesan tomate, brinjela no seluk tan. Orijen mai husi Munisípiu Aileu,Postu-Administrativu Remexio, Suku Fahisoi, Aldeia Mautoba, dadaun ne’e hela iha Aldeia Moris Foun, Suku Comoro,
Matias hateten Loron-loron nia kontinua buka moris nu’udar aileba hodi sustenta família, liuliu oan sira nia sei presiza apoiu ba moris loron-loron nia.
“Kada loron lao tuir dalan ninin ho Ai-leba hodi fa’an tomate, brinjela no mostarda iha sidade Dili. Ha’u hahú fa’an sasan iha tinan 2015 too ohin loron, husi negosiu ki’ik ne’e bele sustenta oan na’in 16 to’o balu forma ona família no balu agora tur iha nivel universidade. husi negósiu ki’ik ne’e mak sustenta ba familia no oan na’in 16, kompostu husi feto 5 no mane 11, daudaun ne’e na’in 9 forma ona família no na’in 5 konsege susesu no hetan ona servisu, na’in 3 seluk dadaun ne’e kontinua hela iha nivel universitariu”. Dehan Matias iha Aldeia moris foun, (12/06/2026)
Maski idade lao ona ba katuas, Matias nafatin iha espíritu forte no vontade boot atu servisu. Hahu dadeer sedu, nia sai husi uma hodi lori nia ekipamentu no ba halo servisu aileba iha fatin ne’ebé presiza. Rendimentu ne’ebé nia hetan la boot, maibé suficiente atu ajuda sustenta família no responde ba nesesidade básika sira.
“Husi dader tuku 07:20 ha’u lori modo sai husi uma, la’o husi Aldeia Moris Foun sa’e ba Ponte Foun, hafoin tuun fali ba tasi-ibun, bainhira modo menus ka hotu ona, ha’u fila mai uma hodi han meudia, depois han, kontinua ba fali Taibesi hodi hola modo foun tan, hodi fa’an fali iha lorokraik, komesa husi tuku 5 to’o tuku 7 kalan, modo sira ha’u $20 dolar, fa’an hotu ha’u bele hetan funan $10 to’o $15,” nia esplika
Matias dehan katak moris la fasil, tanba presu sasán aumenta no nesesidade família mós barak. Maibé ba nia, servisu mak dalan ida atu bele kontinua fó ai-han no edukasaun ba oan sira. Maske katuas ona, hau Matias dehan katak moris la fasil, tanba presu sasán aumenta no nesesidade família mós barak. Maibé ba nia, servisu mak dalan ida atu bele kontinua fó ai-han no edukasaun ba oan sira.
“Maski hau katuas ona, hau sei servisu tanba hau hakarak haree hau nia oan sira bele moris di’ak no iha futuru ne’ebé naruk liu,” dehan Matias ho laran metin.
Istória Matias de Jesus sai hanesan ezemplu ba perseveransa no responsabilidade iha família. Nia dedikasaun hatudu katak idade la’ós obstákulu ida atu nafatin luta ba moris no sustenta ema sira ne’ebé ita hadomi.
Reportajen: Baquita/Juliana
Foto:Baquita