Díli 02 de Juñu 2026 (Media Democracia)-Governu ofisialmente lansa plataforma Verify.gov.tl hanesan sistema verifikasaun dijital ida atu hametin seguransa dokumentu públiku. Plataforma ne’e kria hodi prevene falsifikasaun Karta Kondusaun no fasilita entidade relevante sira atu verifika autentisidade dokumentu ho lalais no transparente.
Tuir Ministru Transporte no komunikasaun Miguel Manetelu hateten Lansa plataforma ida ne’e atu asegura orijinalidade dokumentus no prevene falsifikasaun dokumentus Sira.
“Plataforma ne’e dezenvolve bazeia ba memorandu entendimentu ne’ebé asina ona entre Timor-Leste no Kamboja iha loron 20 Janeiru 2025, no sei implementa ba sistema verifikasaun karta kondusaun atu asegura orijinalidade dokumentu no prevene falsifikasaun. Ekipa tekníku mai hato’o ba ita nia Diresaun Ponte Terestre para atu aplika uluk verify ne’e iha karta kondusaun no hahú husi Marsu 2025 ne’e tekniku sira hahu servisu ne’e no konklui kuaze iha fulan Novembru maibé la konsege lansa no ohin mak ita iha oportunidade atu lansa tanba planu ne’e mai kedas husi 2025 ita hadi’a mak ohin foin lansa plataforma ida naran verify.gov.tl”. Hateten Ministru Transporte no komunikasaun Miguel Manetelu iha Salaun Multiuzu GMN Bebora Dili (01/06/2026).
Aleinde ne’e Ministru Transporte no komunikasaun Afirma tan katak Governu mos se’i troka Karta kondusaun Manual hotu Karta kondusaun foun ho QR code no sistema ne’e se’i ajuda husi Diresaun Nasional Transporte Terrestre (DNTT).
“Plataforma Verify.gov.tl sei integra QR Code iha karta kondusaun sira atu fasilita prosesu verifikasaun no aumenta seguransa dokumentu ofisiál. Governu mós planeia atu troka karta kondusaun manual hotu ba karta kondusaun foun ho QR Code, tantu ba lisensa provizóriu hanesan mós permanente.Sistema foun ida ne’e sei ajuda Direção Nasionál Transportes Terrestres (DNTT) atu halo kontrolu di’ak liu tan, inklui medida hasoru ema sira ne’ebé viola regra tráfiku grave, liu husi mekanizmu verifikasaun ne’ebé modernu no efisiente. Tanba ne’e mak sira balun teste ne’e iha ona Karta kondusaun ho QR code ne’e no ba oin ita se’i fó sai ba publiku para depois Karta kondusaun sira be manual ne’e ita se’i troka hotu “. Afirma Ministru.
Iha Sorin seluk Ministru Poste no Telekomunikasaun Reinu Kamboja, Chea Vandeth Hateten Plataforma verify se’i dezenvolve hamutuk ho ekipa tekníku Timor-Leste no Kamboja no apoiu peritu sira iha area teknológia.
“Plataforma Verify.gov.tl dezenvolve hamutuk entre ekipas tékniku Timor-Leste no Kamboja ho apoiu peritu sira iha área teknolojia. plataforma ne’e la rai dadus utilizadór sira, tanba informasaun hotu permanece iha Ministériu Transportes no Komunikasaun, no asesu ba dadus sei presiza prosesu verifikasaun uluk atu garante seguransa no privasidade utilizadór sira “Dehan Ministru Kamboja.
Governu lansa plataforma dijitál http://Verify.gov.tl ho objetivu atu hametin seguransa dokumentu públiku no prevene falsifikasaun Karta Kondusaun. Plataforma ne’e permite entidade relevante sira verifika autentisidade Karta Kondusaun ho lalais no transparente, hodi hamenus risku uzu dokumentu falsu iha Timor-Leste.
Reportajen: Novita Soares/ Baquita Marcal
Foto: Baquita