Dili, 8 Setembru 2026 (Media Democracia) – Komisaun Organizadora Konjunta, ne’ebé kompostu husi Igreja Katólika no Governu Repúblika Demokrátika Timor-Leste, anúnsia ordenamentu tráfiku, rota prosisaun/konvoi, no regras ba serimónia ikus, trasladaun no sepultamentu restos mortais Preladu Na’in-Haat, ne’ebé sei hala’o iha Kinta-feira, 10 Setembru 2026, iha Igreja Sé Catedral, Dili.
Prezidente Komisaun Organizadora, Padre Guilermino da Silva, hatete katak medida sira-ne’e importante atu garante ordem públika, seguransa, no dignidade durante prosesu serimónia. Tanba ne’e, nia husu ba populasaun tomak atu kumpri orientasaun no informasaun ne’ebé Komisaun fó sai.
“Santa Missa no Aktu Ofisiál iha Tasi-Tolu Santa Missa sei hala’o iha Esplanada Tasi-Tolu, hahú tuku 17:00 (5:00 loraik), no sei preside husi Sua Eminénsia Kardeál Dom Virgílio do Carmo da Silva, Arsebispu Dili no Prezidente Konferénsia Episcopál Timor-Leste (CET), hamutuk ho Bispu Dioséze Maliana no Baucau, no relijiozu no relijioza sira.” Dehan Prezidente Komisaun Organizadora, Padre Guilermino (08/09/2026)
Nia esplika Hafoin Santa Missa, sei kontinua ho aktu no diskursu ofisiál sira, ne’ebé sei inklui leitura despaxu husi Sekretáriu-Jerál CET, diskursu husi Pró-Prezidente CET, no diskursu husi Prezidente Repúblika.
Padre Guilermino hatete informasaun hirak-ne’e ba jornalista sira iha altar Tasi-Tolu. Prosisaun no Taka-Dalan
“Hafoin simu bensaun ikus iha Santa Missa, por volta tuku 18:30 loraik, prosisaun ka konvoi trasladaun restos mortais sei hahú husi Esplanada Tasi-Tolu, liu husi Rotunda Nicolau Lobato iha Comoro, Fatuhada, Kampung Alor, Aitarak-Laran, besik Rua Colmera, no kontinua ba Paróquia Nossa Senhora da Imaculada Conceição (Sé Catedral Dili). Dalan boot sira tuir rota prosisaun ne’e sei taka totalmente ba veikulu privadu no públiku, hahú tuku 18:00 loraik to’o prosisaun/konvoi remata iha Sé Catedral. Taka-dalan sei inklui mós estrada sira iha parte oin Igreja Catedral, iha sorin liman-los no liman-karuk”. Nia relata
Nia informa tan Akolhimentu Tradisionál no Sepultamentu iha Catedral Wainhira urna restos mortais to’o iha oin Igreja Catedral, sei hala’o akolhimentu tradisionál (Dadolin), no sei iha ritu kari ai-funan husi labarik sira no komunidade lokál.
Hafoin ne’e, serimónia sepultamentu iha laran Catedral sei preside husi Dom Leandro Maria Alves, Bispu Baucau no Sekretáriu-Jerál CET, ho akompañamentu husi koru.
Nia subliña tan Mobilidade ba Membru Governu no Alta Entidade, Atu evita konjestaun tráfiku no konvoi veikulu ne’ebé naruk liu iha estrada, membru Governu no alta entidade sira sei uza autokaru ka bis ne’ebé Komisaun Organizadora prepara husi Tasi-Tolu ba Sé Catedral.
Padre Guilermino husu ba sarani no komunidade sira ne’ebé iha Tasi-Tolu no la konsege la’o to’o Sé Catedral atu hela iha Tasi-Tolu, tanba sei iha transmisaun direta (live streaming) kona-ba serimónia.
“Komisaun husu ba sarani no komunidade sira ne’ebé iha Tasi-Tolu no la konsege la’o to’o Catedral, atu bele hela de’it iha Tasi-Tolu no akompaña serimónia liu husi transmisaun direta,” dehan Padre Guilermino.
Prezidente Komisaun Organizador esplika mós katak iha regulamentu espesífiku ba meius komunikasaun no jornalista sira durante serimónia iha laran Catedral.
Nia hatete katak espasu iha laran Catedral limitadu tebes, tanba sei hala’o serimónia sepultamentu ba Preladu Na’in-Haat ho protokolu no onra militár.
“Tanba espasu limitadu, media no jornalista sira ne’ebé sei hetan asesu ba laran Catedral mak RTTL no balun husi GMN TV ne’ebé sei halo transmisaun direta. Media sira seluk sei halo cobertura to’o iha entrada Catedral de’it,” dehan Padre Guilermino.
Nia husu ba media sira seluk atu uza link ka output husi transmisaun ofisiál RTTL no GMN TV, atu bele kontinua halo transmisaun ka publikasaun kona-ba serimónia sepultamentu restos mortais iha Sé Catedral.
Serimónia no atividade sira hotu iha loron 10 Setembru sei dirije, orienta no koordena husi Komisaun Organizadora Konjunta husi Igreja no Governu.
Governu no Igreja Katólika husu kooperasaun, kompreensaun no apoiu tomak husi populasaun, liuliu sarani sira, atu kumpri orientasaun sira ne’ebé fó sai. Ida-ne’e atu garante prosesu trasladaun no sepultamentu restos mortais Preladu Na’in-Haat bele hala’o ho dignidade, dame no hakmatek.
Reportajen : Estefania Cardoso
Foto : Estefania Cardoso