Dili 02 Juñu 2026 (Media Democracia)- I Vice-Primeiru Ministru, Ministru Koordenadór Asuntu Ekonómiku no Ministru Turismu no Ambiente, IX Governu Konstitusionál reafirma kompromisu governu atu proteje no jere sustentavel rekursu mariñu iha Timor-Leste.
Tuir I Vice Primeiru-Ministru, Fransisco Calbuady Lay iha nia komunikadu hodi selebra Loron Nasionál Tasi ne’ebé sei monu iha loron 5 fulan Juñu tinan 2026, nia afirma, Tasi nu’udar patrimóniu nasionál, fonte moris no elementu importante ba identidade kultura povu Timor-oan no jerasaun sira tuir mai.
“Loron Nasionál Tasi fó hanoin mai ita hotu kona-ba responsabilidade hamutuk atu proteje ita-nia Tasi, promove prátika peska sustentavel no garante konservasaun ekosistema mariñu sira nune’e bele sustenta moris no dezenvolvimentu ba ita-nia Nasaun,” haktuir iha komunikadu ne’ebé fó sai iha, CCD, 2 Juñu 2026
I Vice Primeiru-Ministru esplika, sei kontinua implementa polítika Planu asaun ba Promosaun Ekonómia Tasi ne’ebé reziliente no sustentavel, atu implementa ne’e, governu sei kombate poluisaun iha Tasi no jestaun sustentavel ba rekursu sira husi Tasi no iha área kosteira.
“Selebrasaun tinan ne’e, governu sei hala’o atividade oioin inklui kampaña sensibilizasaun ambientál, atividade limpeza tasi, no programa edukativu ba juventude, inisiativa sira ne’e promove ekonómia azul sustentavel lidera husi, Primeiru-Ministru no Gabinete Fronteiras Terrestres no Marítimas, hamutuk ho Ministériu Agrikultura, Peskas e Florestas, Ministériu Edukasaun no Marítimas, Ministériu Komérsiu no Indústria, Ministériu Transporte no Komunikasaun, PNTL, Turizmu no Ambiente, SECOMS, Atividade sei hala’o iha Munisípiu Dili, Lautém, Postu Ataúro no Munisípiu sira seluk,” Nia hateten
Vice Primeiru-Ministru mós husu ba sidadaun hotu-hotu atu partisipa ativa iha loron Loron Nasionál Tasi ne’ebé sei monu iha loron 5 fulan Juñu tinan 2026.
“Nune’e, husu ba partisipasaun tenke ativa husi sidadaun hotu-hotu atu proteje ambiente mariñu, Konservasaun TASI no OSEANU sira maka responsabilidade hamutuk ida, ne’ebé presiza kooperasaun entre Governu, setór privadu, komunidade sira no parseiru internasionál sira, no ami mós rekoñese kontribuisaun komunidade lokál organizasaun sosiedade sivil, parseiru dezenvolvimentu no instituisaun públika sira ne’ebé durante ne’e kontribui tebes ba preservasaun Tasi Timor-Leste nian” Nia subliña
Komunikadu ne’e sai nu’udar xamada ba hotu-hotu atu valoriza no proteje Tasi, tanba nia nu’udar patrimóniu no sustenta moris Timor-Leste nian ba tinan barak tuir mai.
Reportajen: Leozalia Oliveira
Foto: Juliana Trindade