Díli, 17 Setembru 2026 (Media Democracia) – Diretór Ezekutivu Servisu Imigrasaun, Komisáriu Asistente Polísia Jorge Monteiro, informa katak durante períodu husi Janeiru to’o Agostu 2026, total sidadaun estranjeiru ne’ebé tama iha territóriu nasionál Timor-Leste hamutuk ema na’in 282.304.
Nia hatete katak distribuisaun entrada sidadaun estranjeiru kada fulan hahú husi Janeiru ho ema na’in 34.012, Fevereiru 27.364, Marsu 31.739, Abril 34.895, Maiu 35.917, Juñu 40.302, Julhu 42.017, no Agostu 36.058.
“Sidadaun estranjeiru sira-ne’e mai husi nasaun oioin. Iha lista nasaun sira ho númeru entrada aas liu, Indonézia okupa pozisaun primeiru ho ema na’in 82.193, tuir Repúblika Populár Xina ho 11.340, Austrália 7.312, Portugal 6.236, no Filipina 1.682,” nia dehan.
Komisáriu Asistente Polísia Jorge Monteiro mós informa katak iha lista 10 nasaun ho númeru entrada aas, Estados Unidos da América rejista ema na’in 1.640, Malázia 1.499, Índia 1.439, Japão 1.247, no Singapura 1.083.
Enkuantu ba lista to’o 20 nasaun, Reino Unido rejista ema na’in 886, Vietnam 728, Coreia do Sul 468, Nova Zelándia 428, Alemanha 405, França 402, Rússia 184, Israel 60, Repúblika Islámika Irán 12, no Turquia 11.
Aleinde ne’e, durante períodu hanesan, Servisu Imigrasaun mós rejista sidadaun estranjeiru hamutuk ema na’in 278.624 ne’ebé sai hosi territóriu nasionál Timor-Leste.
Nia haktuir relasiona ho emisaun vistu iha Servisu Imigrasaun durante períodu Janeiru to’o Agostu 2026, autoridade sira emite vistu turista hamutuk 135.170. Dadus ne’e mós inklui vistu servisu no renovasaun, vistu negósiu klase II, vistu temporáriu, fiksaun no autorizasaun rezidénsia, tuir kategoria emisaun ne’ebé aplikável.
Iha parte seluk, Diretór Ezekutivu Servisu Imigrasaun hatete katak sidadaun estranjeiru sira ne’ebé suspeitu komete krime burla informátika no tama iha prosesu judisiál, Servisu Imigrasaun simu ordem hosi Tribunál Primeira Instánsia Díli atu bandu sira sai hosi territóriu nasionál.
“Total sidadaun estranjeiru ne’ebé sujeitu ba ordem tribunál ne’e hamutuk ema na’in 132, kompostu hosi sidadaun Repúblika Populár Xina ema na’in 79 no Repúblika Indonézia ema na’in 53,” nia informa.
Nia esplika, medida ne’e aplika tanba sidadaun estranjeiru sira-ne’e sei iha prosesu judisiál no presiza kontinua enfrenta prosesu tuir lei iha Timor-Leste.
Iha sorin seluk, Jorge Monteiro haktuir durante Janeiru to’o Agostu 2026, Servisu Imigrasaun mós aplika rekuza entrada ba sidadaun estranjeiru hamutuk ema na’in 82.
“Rekuza entrada aplika ba ema sira ne’ebé la kumpre rekizitu atu tama iha territóriu nasionál, inklui bainhira autoridade imigrasaun halo verifikasaun ba dokumentu viajen no rekizitu sira iha pontu entrada terrestre, portu no aeroportu,” nia adianta.
Servisu Imigrasaun mós hala’o medida administrativa ba sidadaun estranjeiru sira ne’ebé viola kondisaun vistu ka hela ilegalmente iha territóriu nasionál, liuhosi expulsaun administrativa no prosedimentu abandona voluntariamente territóriu nasionál.
Nia subliña katak diseminasaun informasaun kona-ba dadus no atividade imigraçaun importante atu fó komprensaun ba públiku kona-ba movimentu sidadaun estranjeiru sira tama no sai hosi Timor-Leste, no mós kona-ba implementasaun kontrolu imigraçaun tuir lei.
Jornalista: Estefánia Cardoso
Foto: Estefánia Cardoso