Dili, 23 Juñu 2026 (Media Democracia)– Kadaver Eis Prezidente Repúblika Demokrátika Timor-Leste no atual Prezidente Partidu FRETILIN, Francisco Guterres “Lú-Olo”, to’o ona iha Aeroporto Internasional Presidente Nicolau Lobato, Komoro, Dili, ho aviaun Aero Dili iha Tersa-feira (23/06), dader tuku 06:35 Otl.
Tuir Observasaun Media Democracia katak, Mate isin saudozu simu direita husi Governu Timor-Leste, família no entidade relevante sira ho serimónia parada militar ida molok translada ba nia rezidénsia matebian nian iha Farol, Dili.
Saudozu Francisco Guterres “Lu-Olo” akompaña husi nia espoza, Dona Cidália Lopes Nobre Mouzinho Guterres, no nia oan na’in haat, mak hanesan, Francisco Cidálio Nobre, Nobrezino Guterres, Sam no Dália Luliana Nobre Guterres. Iha mos Sekretáriu-Jerál Partidu FRETILIN, Mari Bin Amude Alkatiri, ne’ebé akompaña familia durante viajen husi Malázia mai Timor-Leste.
Iha prosesu hatun kadaver husi aviaun, Primeiru-Ministru Interinu Mariano Assanami Sabino akompaña serimónia ne’ebé militar na’in 10 lori maktoban ba fatin parada militar nian, no entrega ba militar na’in 8 atu kontinua serimónia ofisial antes lori mate isin ba karru funeral F-FDTL ne’ebé Governu prepara ona.
Iha Aeroportu Internasional Presidente Nicolau Lobato, mate isin saudozu simu direita mos husi família boot, reprezentante Prezidente Repúblika, Xefe Casa Sivil, eis Primeiru-Ministru Taur Matan Ruak, membru Governu, deputadu, Tenente-Jeneral Falur Rate Laek, Lere Anan Timur veteranu sira, no simpatizante Partidu FRETILIN, no povu tomak.
Iha Aeroportu nakonu ho emosaun no tristeza. Povu barak ho matan-ben simu saudozu Francisco Guterres “Lú-Olo”, nu’udar líder nasional ida ne’ebé dedika nia moris ba luta libertasaun no dezenvolvimentu Timor-Leste.
Saudozu hakotu iis iha Hospital Prince Court, Kuala Lumpur, Malázia, iha loron Domingu, 21 Juñu 2026, tuku 23:15 oras Malázia, bainhira hala’o tratamentu médiku intensivu.
Durante translada husi aeroportu ba rezidénsia Farol, komunidade sira, estudante no funsionáriu públiku barak halibur iha beira dalan husi Rotunda Presidente Nicolau Lobato to’o Farol hodi fó omenajen no kondolénsia ikus ba líder istóriku ne’e.
Povu Timor-Leste senti perda boot ida tanba saudozu Francisco Guterres “Lú-Olo” la’ós deit líder polítiku ida, maibé mos ema ne’ebé servi nasaun desde tempu luta ba independénsia, iha períodu Timor-Leste ukun rasik-aan no independénsia tomak. Durante nia karreira polítika, nia assume kargu importante sira hanesan Prezidente Assembleia Konstituinte, Prezidente Parlamentu Nasionál no Prezidente Repúblika Demokrátika Timor-Leste.
Bainhira mate isin to’o iha rezidénsia Farol, família simu ho ritual lisan no orasaun tradisionál ne’ebé lidera husi nia alin, Domingos Guterres, molok tau mate isin iha fatin ne’ebé prepara ona.
Tuir programa ofisiál ne’ebé Governu, família no Partidu FRETILIN publika ona, instituisaun estadu sira, lider relijiozu, Eis-Titulares Órgaun Soberania, Membru Governu, Korpu Diplomátiku no bainaka sira seluk sei presta omenajen ikus ba saudozu Francisco Guterres “Lu-Olo” durante períodu velóriu nian.
Reportajen :Tomás dos Santos
Foto :Nelson Pereira