Díli, 23 Juñu 2026 (Media Democracia) – Cruz Vermelha Timor-Leste (CVTL) selebra nia aniversáriu ba dala 26 ho tema “Hamutuk ba Umanidade”, hodi hametin espírito voluntariadu no servisu umanitáriu ba komunidade no grupu vulnerável sira iha Timor-Leste.
Prezidente CVTL, Madalena Soares Hanjam, hatete katak tema ne’e reflete komitmentu organizasaun nian atu kontinua fó servisu no protesaun ba komunidade sira ne’ebé presiza apoiu.
“Ohin ita selebra tinan 26 CVTL nia ezisténsia iha ita-nia rain. Tema ‘Hamutuk ba Umanidade’ reflete ita-nia servisu no prestasaun ba komunidade no populasaun sira ne’ebé presiza apoiu. Ami hakarak atu responde ba nesesidade umanu sira iha kondisaun oioin,” hatete Madalena Soares Hanjam durante selebrasaun iha Salaun CVTL Formosa, loron 22 Juñu 2026.
Nia mos husu apoiu husi parseiru no komunidade sira atu hametin movimentu umanitáriu, ne’ebé bazeia ba kultura, tradisaun no valor solidariedade povu Timor-Leste nian.
“Ami presiza imi nia apoiu atu hametin servisu umanitáriu ne’e. Ita hakarak atu reflete nesesidade umanu sira iha ita-nia kultura no tradisaun. Ho ne’e, ami bele kontinua hala’o servisu ne’ebé fó benefísiu ba komunidade,” dehan nia.
Prezidente CVTL akresenta katak organizasaun sei kontinua mobiliza voluntáriu sira hodi hala’o atividade umanitária tuir planu estratéjiku CVTL nian, inklui preparasaun hasoru risku mudansa klimátika no dezastre naturais.
“Ami sei mobiliza voluntáriu sira atu hala’o atividade voluntáriu no atualiza nafatin ami-nia planu estratéjiku. Ho preparasaun di’ak, CVTL bele responde lalais ba situasaun emerjénsia no apoiu komunidade sira ne’ebé presiza asisténsia,” hatutan nia.
Selebrasaun aniversáriu ba dala 26 ne’e mos sai oportunidade atu rekoñese kontribuisaun voluntáriu no funsionáriu CVTL sira ne’ebé durante tinan barak dedika-an ba servisu umanitáriu iha área saúde, resposta ba dezastre, no apoiu ba komunidade vulnerável sira iha Timor-Leste.
Reprtajen : Baquita/ Novita
Foto : Novita