Dili, 05 Fevereiru 2026 (Média Democracia) – Kadetes foun PNTL realiza konferensia imprensa hodi deklara ba publiku kona-ba preokupasaun rezultadu publikasaun lista rekrutamentu PNTL iha loron 03 fulan fevereiru 2026 ne’ebé la nesesáriu hodi hamosu deskonkordasaun. Konferensia refere hala’o iha Salaun HAK.
Porta-voz kadetes foun PNTL Deolando Yano Mendonça hateten iha konferensia imprensa kona-ba lista rekrutamentu PNTL nian la nesesáriu tanba dejisaun ne’ebé la justu no diskriminativu, husu Ministeriu Interior liuhusi PNTL imediatamente atu anula Dejisaun.
“Governu liuhusi Ministeriu Interior no Komandu PNTL ne’ebé halo rekrutamentu ba kadetes foun iha periodu tinan 2025 nian. Ne’ebé ami hotu konkore ba iha rekrutamentu refere no tuir hotu prosesu sira hanesan teste eskrita no fiziku liuhusi regulamentu ne’ebé estabelese husi komisaun rekrutamentu.” Dehan Porta-voz Kadetes foun PNTL, Deolando Yano Mendonça
Porta-voz afirma, iha loron 03 fulan fevereiru tinan 2026, Komisaun rekrutamentu PNTL liuhusi Porta-voz Antonio da Luz lee sai lista kantidatu foun liuhusi fontes media ho total kandidatu rihun sanulu resin-rua atus-ualu hitunulu resin-haat (12.874). Husi ne’e kandidatu rihun sanulu atus-lima sianulu resin-hitu (10.597) mak aprovadu, no kandidatu rihun rua atus-rua hitunulu resin-hitu (2.277) mak la aprovadu.
“Husi kandidatu aprovadu hamutuk atus haat (400) husi kuota kada Munisipiu maka sei tuir teste médiku. Ami ba estatutu kategoria aprovadu hotu maibé limita ami labele tuir teste mediku no fó prioridade atu tuir teste mak sira ne’ebe iha numeru kiik tuir kuato Munisípiu ida-idak nian. Husi teste ne’e identifika kandidatu balun kondisaun saude la permiti mak sei kontaktu/bolu tuir lista ne’ebé iha.” Afirma Porta-voz
Porta-voz informa, relasiona ho kandidatu ne’ebé la pasa totalmente lamentavel ho dejisaun ne’ebé la justu, diskriminativu no la garantia prinisipiu boa governasaun tanba tendensia ba familiasimu no grupuismu, tanba iha teste ne’e rasik la hatudu tuir regras ne’ebé hasai ona antes halo prosesu rekrutamentu.
“Ami nia observasaun lista sira ne’ebé ho numeru ki’ik maioria husi Komandante Polisia nia oan no Komandante Polisia sira familia nia oan. Iha parte seluk mós kona-ba membru polisia balun ne’ebé tama iha komisaun rekrutamentu halo atendimentu la hatudu profisional servisu tuir regulamentu ne’ebé iha, maibé halo fali atendimentu espesial iha prosesu rekrutamentu tanba kandidatu balu la priense kriteriu bazeia ba regulamentu ne’ebé komisaun hatur, maibė ikus naran tama hotu lista aprovadu.” Infroma Porta-voz Kadetes foun PNTL, Deolando Yano Mendonça
Porta-voz relata, relasiona ho problema hirak ne’e parte kadetes foun ne’ebé la pasa hakarak husu ba Ministeriu Interior no PNTL imediatamente atu anula dejisaun, hodi la fó de’it teste mediku ba kandidatu nain atus haat (400) maibé fó oportunidade hotu ba kandidatu sira ne’ebé ho kategoria la aprovadu.
“Iha biban ne’e ami hakarak husu mós ba CAC no PDHJ imediatamente atu halo investigasaun ne’ebé kle’an hodi hatene tendensia ba familiarismu no grupuismu iha prosesu rekrutamentu, tanba lista ne’ebé ho numeru kiik diskonfia husi Polisia nia oan no ninia familia nia oan sira.” Relata Porta-voz
Nia salient, iha biban ne’e nafatin husu ba Ministeriu Interior ho PNTL atu estebelese ekipa independenti hodi halo investigasaun ba prosesu rekrutamentu ne’ebé iha, tendensia ba familiarismu no grupuismu iha prosesu rekrutamentu tanba iha prosesu teste la tuir regulamentu ne’ebé estabele ona.
Esplika liután liuhusi konferensia imprensa ida ne’e hakarak husu ba Parlamentu Nasional Komisaun B ne’ebé trata asuntu Negósiu Estranjeiru, Defeza ho Seguransa atu halo fiskalizasaun imediata ba prosesu rekrutamentu ne’ebé iha tendensia ba familiarismu no grupuismu iha prosesu rekrutamentu, nune’e bele halo investigasaun ruma liga prosesu rekrutamentu ne’ebé kria falimiliarizmu.
Reportajen : Nelfiano
Foto : Nelfiano