Dili, 05 Fevereiru 2026 (Média Democracia) – Sekretáriu Estadu ba Formasaun Profesionál no Empregu (SEFOPE) servisu hamutuk ho Governu Nova-Zelandia asina akordu entre traballadór nain sanulu (10) hodi ba servisu iha area hortikultura iha nasaun Nova-Zelandia.
Tuir Sekretáriu Estadu ba Formasaun Profesionál no Empregu (SEFOPE) Rogerio Araujo Mendonça hateten, ohin realiza programa mobilidade laboral ne’ebé hanaran RSA, no programa refere hala’o iha tinan 2025 mai to’o tinan 2026 hodi haruka joven nain 10 ba servisu iha Nova-zelandia, ne’e hanesan pilotu primeiru ne’ebé liuhusi programa RSA no traballador sira sei servisu fulan 7 to’o fulan 9.
“Servisu refere iha tempu ne’ebé badak, iha fulan 7 to’o fulan 9 depois ida ne’e sei kontinua fila fali bainhira empregador sira haree ita-nia trabalhador sira servisu ho kualidade di’ak, entaun sira bele hasa’e mós ba tinan rua ka tinan haat. Ha’u hanoin kona-ba salariu ne’e kapas tebes bazea ba akomodasaun ne’ebé ami halo ona, tanba Senhor Mateus Gips ne’ebé servisu hamutuk ho SEFOPE iha tinan kotuk, hala’o vitzita no observa direta ba akomodasaun sira, no salariu ne’ebé atu fó ba ita-nia traballador sira mós bazea ba estandar Nova-Zelandia nian, maibé agora ha’u labele pronunsia sai lai total salariu.” Dehan Sekretáriu Estadu ba Formasaun Profesionál no Empregu SEFOPE Rogerio Araujo Mendonça iha Manleuana.
Sekretáriu hatutan, rekrutamentu ne’ebé agora hala’o ne’e husi empregador rua de’it, espera iha fulan marsu no maiu empregador barak liután mai halo rekrutamentu ba ita-nia traballador sira ne’ebé iha ona sistema pilotu primeiru.
“Ha’u hanoin politika Governu nian bele lori sentru formasaun sira ba iha Munisipiu ida-idak ka to’o iha postu, nune’e ita-nia joven sira bele asesu bainhira iha rekrutamentu hanesan ne’e sira mós bele hetan oportunidade ba serivisu. Ita agora haree katak traballdor barak mak re-entri, ne’e signifika katak empregador sira fó konfiansa ba ita-nia traballador hodi ba fali halo servisu iha sira nia kompaña, no numeru husu traballdor foun mós aumenta ba nafatin.” Hatutan Sekretáriu Estadu ba Formasaun Profesionál no Empregu SEFOPE
Sekretáriu ne’e salietan tan, iha tinan 2024 bainhira sira mai aprezenta sira hateten presija ema 27 mil pessoas atu mai servisu iha Asia pasifik, nune’e ita Timor-Leste tenke prepara-an didi’ak hodi hein oportunidade refere, espera iha tinan 2026 ita Timor bele prense ho numeru ne’ebé boot.
Reportajen : Estajiadu Marito
Foto : Marito