Dili, 15 Jullu 2026 (Media Democracia)- Prezidente Komisaun Rekrutamentu ba Kandidatu Estudante Akademia Militár 2026, Nuno Manuel Corvelo, hatete kandidatu estudante Akademia Militár Konjunta hamutuk ema nain-63 mak konsege admite ba faze tuir mai, hanesan teste aptidaun militár, depois de liu tiha prosesu selesaun iha etapa dahuluk.
Nia dehan, durante prosesu rekrutamentu, Komisaun hala’o ona teste aptidaun fizika, teste saúde no psikoteste ho di’ak, Iha faze sira ida ne’e kandidatu estudante balun la konsege liu tanba la prienxe rekizitu ne’ebé determina.
Dadaun ne’e, prosesu rekrutamentu tama ona ba faze teste aptidaun militár, no kandidatu estudante Akademia Militár Konjunta hamutuk ema nain-63 mak konsege admite atu partisipa iha etapa ida ne’e.
“Rezultadu Akademia Militár ne’e konta teste ida foin dadaun ne’e sira konklui ona liliu ida teste ikus liu ne’e mak iha ema nai’in- 63 mak sei iha ne’ebá. Iha barak mós laliu iha teste fiziku, teste saúde no prova orál. Tanba siénsia ne’e ita foti ne’e barak einbora husi siénsia ezaktu de’it tanba ne’e mak barak mak lakonsege.” Nuno Corvelo hateten ba jornalista sira iha Muzeum Rezisténsia tersa ne’e (14/07).
Nuno esplika, kandidatu estudante Akademia Militár Konjunta na’in-63 ne’ebé admitidu iha faze aptidaun militár sei dezloka ba edifísiu Akademia Militár Konjunta iha Munisípiu Aileu durante loron 10 hodi tuir prosesu avaliasaun aptidaun militár tuir kalendáriu ne’ebé estabelese ona husi komisaun rekrutamentu.
Nia dehan, durante teste aptidaun militár ne’ebé sei realiza durante loron 10, kandidatu estudante sira sei adapta ba natureza no vida militár, bainhira iha teste mak kandidatu sira la kumpre ba regulamentu vida militar ne’ebé eatabelese, komisaun rekrutamentu sei halo eleminasaun.
“Kuandu sira liu faze ne’e, entaun ita admite sira hodi koñese klean liu tan akademia konsulta ba fulan hira tan no tinan oin sira hahú halo eskola.” Nuno Carvelo afirma
Reportajen : Estefania Cardoso
Foto : Estefania Cardoso