Dili, 15 Jullu 2026 (Media Democracia)- Lidia da Silva, feto joven ho tinan 26, husi Munisípiu Viqueque, Postu-Administrativu Uatucarbau, Suku Wemua, Aldeia Komonu, agora dadaun hela iha Suku Comoro, Aldeia Moris Dame, Dili, kontinua luta buka moris liuhusi negósiu ki’ik fa’an roupa hodi sustenta nia estudu no ajuda família, maske mai husi família agrikultór ne’ebé hasoru dezafiu ekonomia iha moris loron-loron.
Lidia hateten katak durante seida’uk kontinua ba univesidade hahú halo ona negosiu rasik hanesan fa’an roupa iha Kampun baru, Comoro.
“Hau iha negosiu rasik, antes atu kontinua ba iha Universidade Nasional, Timor Loro Sa’e (UNTL), Fakuldade Edukasaun no Humanidade, Departamentu Formasaun Professores no Ensino Básiku iha tinan 2020 no remata iha tinan 2026. No dadaun ne’e ha’u kontinua ho nia esperénsia negosiu nian ne’ebé durante ne’e ha’u iha, no hetan suporta makaas husi familia liu-liu ha’u na maun boot ne’e fasilita hja’u ho osan montante $120, hodi kontinua loke negosiu ki’ik ida ne’e, hodi sustenta ha’u nia moris, balun hodi selu eskola no uma kos balun hodi kompleta ba nesidade familia nian.” dehan Lidia, iha Kampun Baru, 14/07/2026
Maski hasoru konkurénsia maka’as iha negósiu fa’an roupa, kontinua esforsu atu sustenta moris no família.
Nia hatete katak dezafiu boot ne’ebé nia hasoru mak menus kompradores tanba maioria ema iha fatin ne’ebá mós halo negósiu hanesan.
“Dezafiu ne’ebé ha’u hasoru mak dala ruma loron tomak to’o kalan ema ida mós la sosa roupa. Kada vez loron ida hetan rendimentu, $10,20,30 ou bele $100, maibe defende ba kompradores sira, dala ruma loron ida ha’u labele hetan rendimentu, husi rendimentu ki’ik ne’ebé mak ha’u hetan lahamte ha’u nia vontade no esperansa ha’u kontinua pasénsia no fa’an nafatin tanba nesesidade mak obriga ha’u atu la para,” dehan Lidia
Iha oportunidade ne’e, Lidia mós hato’o mensajen ba joven sira atu la depende de’it ba inan-aman, maibé tenke iha vontade no esforsu atu luta ba futuru di’ak.
“Hau nia mensajen ba joven sira mak keta depende de’it ba inan-aman. Hanesan joven, tenke esforsu-an no luta metin nafatin atu bele atinje objetivu no susesu ne’ebé ita hakarak iha moris,” nia hakotu.
Roportajen: Joaninho Martins Estajiariu
Foto: Delfiano