Dili, 09 Novembru 2026 (Média Democracia) – Ministra Saúde, Élia dos Reis Amaral, esplika katak ai-moruk ne’ebé tama iha armajen Ministériu Saúde la hela kleur, tanba sei distribui diretamente ba ospitál sira tuir nesesidade, liuhusi sistema dijitalizadu. Maski nune’e, Hospital Nasionál Guido Valadares (HNGV) rekoñese katak enfrenta limitasaun stok ai-moruk balun ne’ebé presiza atu fó atendimentu ba pasiente sira.
Ministra Saúde Élia dos Reis Amaral hateten, ho implementasaun sistema dijitalizasaun, Ministériu Saúde bele kontrola disponibilidade stok ai-moruk no asegura distribuisaun ba ospitál sira ne’ebé presiza.
“Ita hatene katak ita tama ona ba faze dijitalizasaun. Ita hatene stok out ka lae, maibé stok ne’e la permanente iha armajen, tanba bainhira tama iha armajen, tenke distribui kedas,” dehan Ministra Saúde Élia dos Reis Amaral, iha Parlamentu Nasionál, segunda-feira (09/11).
Iha parte seluk tuir Diretór Servisu Apoiu Diagnóstiku no Terapéutiku Hospital Nasionál Guido Valadares (HNGV), Vidal de Jesus Lopes, rekoñese katak ospitál ne’e enfrenta duni falta stok ai-moruk balun.
“Ami rekoñese katak ospitál enfrenta duni falta stok ai-moruk balun. Ita labele dehan katak ai-moruk iha, tanba ida-ne’e kestaun ne’ebé relasiona ho ema nia moras no vida. Tuir loloos, ita tenke buka solusaun lalais liu posível,” nia dehan.
Vidal de Jesus Lopes esplika responsabilidade prinsipál atu asegura prosesu sosa, rai no distribui ai-moruk ba HNGV iha kompeténsia Institutu Nasionál Farmásia no Produtu Médiku (INFPM), enkuantu HNGV foka liu ba prestasaun servisu saúde no atendimentu ba pasiente sira.
Nia hatutan HNGV halo pedidu ai-moruk ba INFPM regularmente. Prosesu komunikasaun ne’e la’o la’ós de’it liuhusi karta pedidu eskrita, maibé mós liuhusi grupu WhatsApp, atu atualiza no fasilita komunikasaun kona-ba nesesidade ai-moruk loroloron, semanal no mensal.
Komunikasaun ne’e iha objetivu atu asegura katak disponibilidade ai-moruk bele responde ba nesesidade ospitál, nune’e profisionál saúde sira bele kontinua fó atendimentu adekuadu, kura pasiente no salva vida ema nian.
Nia mós informa HNGV iha item ai-moruk hamutuk 4.600, ne’ebé fahe ba kategoria ai-moruk esensiál no vitál. Maski nune’e, ospitál ne’e sei enfrenta limitasaun disponibilidade stok ba ai-moruk balun.
Aleinde ne’e, Vidal de Jesus Lopes esplika HNGV iha alokasaun orsamentu espesífiku ba kompras ai-moruk iha situasaun emerjénsia. Maibé, orsamentu ne’e bele uza de’it ba nesesidade emerjénsia, la’ós ba kompras regulár.
Nia fó ezemplu katak, bainhira ai-moruk ida falta, HNGV bele halo kompras emerjénsia atu asegura disponibilidade ai-moruk ba nesesidade loron ida ka rua, enkuantu hein forneseimentu regulár husi instituisaun kompetente.
Reportajen: Octaviana da Costa
Foto: Octaviana da Costa