Dili, 16 Abril 2025 (Media Democracia)- Primeiuru Ministru Kay Rala Xanana Gusmão tun dirreta iha Kuartel Jerál PNTL akompaña husi Komandante Jerál PNTL, Komisáriu Asistente Afonso dos Santos, hodi haree direta osan falsu ne’ebé ekipa husi Diresaun Servisu Investigasaun Kriminál asegura iha Sala Unidade Polísia Téknika DSIK.
Hafoin Vizita, PM orienta Komandante Jerál Polísia Nasionál Timor-Leste (PNTL), Komisáriu Asistente Afonso dos Santos ho Segundu Komandante Jerál, Komissária Natercia Eufrasia Martins atu kontinua halo investigasaun kle’an bá sidadaun neʼebé deskonfia rai osan Dolar Amerikanu falsu.
Komandante Jerál PNTL Komisáriu Asistente Afonso dos Santos hatete, Primeiru Ministru tun hodi haree rasik osan falsu ne’ebé DSIK asegura no nia orienta ba Komandu atu kontinua halo operasaun.
“orientasaun Maun Boot operasaun sei la’o nafatin, Komandante Operasaun mak ne’e Komandante Investigasaun Kriminál ne’ebé Polísia Nasionál Timor-Leste, ha’u fó ona orden para operasaun iha Timor laran tomak kona-ba osan ida-ne’e.” Dehan Komandante Jerál PNTL Afonso doa Santos ba jornalista sira iha Komandu Jerál PNTL Kuarta ne’e
Nia parte dehan, nu’udar Komandante Jerál sei la tolera ba kazu osan falsu ne’ebé dadaun iha Timor-Leste.
“Ha’u sei la tolera hanesan Komandante Jerál PNTL, sé de’it ha’u la tolera ida, Ida-ne’e mak deteta ona Polísia halo kapturasaun no entrega ba Justisa, seluk laiha, ida-ne’e mak ha’u bele hato’o.” Nia afirma
Iha biban ne’e, Porta Voz PNTL, Diretór Diresaun Servisu Investigasaun kriminal, Superintendente Xefe Polísia João Belo dos Reis Informa, ekipa servisu investigasaun Kriminák halo busak no aoreensaun ba armajen Loja Y&W ne’e detekta osan falsu kaixa neen ho montante dolar miliaun haat resin.
“Ita halo Intervensaun ba Armazen boot ida iha parte Bidau Masaur ne’eba, ita rekolla faktus hotu-hotu ne’ebé relasiona ho krime ne’ebé akontese, ita detekta osan falsu kaixa neen ne’ebe sira koloka kada kotak balun iha ne’eba.” Dehan Dehan Diretór DSIK
Nia Afirma katak, halo ona kalkulasaun Temporária ba Osan Falsu refere ho montante miliaun Haat dolar Amerikano, no ekipa Forensik ho Ofisial Ministeriu Publiku halo ona kontajem ba Osan falsu ne’e hodi hatene lolos montante husi osan Falsu ne’e.
“husi ne’e ita halo kalkulasaun temporaria, katak seidauk los, dolar Miliaun haat mak iha ne’eba, ekipa Forensik hamutuk ho ofisial husi Ministeriu Publiku ninian halo kontajem dadauk ba montante hira mak iha laran lolos, depois aban ka bain rua hau sei publika fila fali winhira ami hetan dadus kompleitu”. Nia esplika
Tanba ne’e Polísia Nasionál Timor-Leste, liuhusi Porta Voz husu ba Populsaun hotu iha Timor laran bainhira detekta osan falsu, kontaktu kedas ba posto polisia ne’ebé besik hodi halo intervensaun.
“Hau hato’o mós ba ita komunidade sira ita nia autoridade sira karik detekta osan ne’ebe deskonfia osan falsu, komunika lalais ba ami ou husi polisia posto ne’ebe besik para ita bele halo intervensaun buka tuir nafatin autor sira ne’ebé foti inisiativa halo asaun krime hanesan ne’e” Nia informa
Hafoin remata Aprensaun Autoridade Seguransa Polísia lori kedas evidensia no asegura sidadaun Xinez na’in-haat no dadaun ne’e iha hela prosesu investigasaun.
Enkuantu mandadu kapturasaun ne’e tuir Delegasaun Kompeténsia husi Ministériu Públiku ba Polísia Nasionál Timor-Leste liuhusi Diresaun Servisu Investigasaun Kriminál (DSIK).
Reportajen : Estefania Cardoso
Foto: Estefania Cardoso