Dili, 14 Abríl 2026 (Media Democracia)- Polísia Nasionál Timor-Leste liuhusi Diresaun Servisu Investigasaun Kriminál (DSIC-Sigla Portugues) halo buska no aprensaun ba armajen loja Y&W Iha Bidau Santa Ana iha dader oras tuku 10.00 otl, no identifika hodi hetan duni osan falsu montante Milliaun $4 USD resin.
Asaun husi Polísia Nasionál Timor-Leste halo atuasaun ne’e bazeia ba delegasaun kompeténsia husi ministériu públiku ho NUC: 0138/26-PNSIC.
Enkuantu fatin armajen loja Y&W ne’e lokaliza iha Aldeia Sagrada Família, Suku Bidau Santana, Postu-Administrativu Kristu-Rei, Munisípiu Díli.
Iha terrenu jornalista observa katak osan falsu kuaze millaun US$4-iha armazen ne’ebé tau iha brankas lima (5) sei mamuk no kaixa boot haat tau osan falsu hodi hakerek iha leten Meas iha laran hamutuk pakote 158 t ne’ebé kada pakote ho osan falsu montante US$100.00 futun tolu no deskonfia totál osan falsu iha kada pakote US$30,000.00.
Bainhira Polísia halo tiha buska no aprensaun hodi hetan evidénsia sira ne’e, lori kedas provas sira hanesan osan falsu hirak ne’e no asegura kedas sidadaun Xinesa na’in tolu no sidadaun Indonésia na’in ida hodi submete ba identifikasaun iha edifísia Diresaun Servisu Investigasaun Kriminál (DSIC) Kuartel Jerál PNTL Caicoli Dili.
Hafoin Ekipa seguransa lori evidénsia hirak ne’e ba iha Kuartel Jerál PNTL Caicoli, iha ne’ebá Komandante jerál PNTL Komisáriu Asistente Afonso dos Santos no Segundu Komandante jerál, Komisária Asistente Natercia Eufrazia Martins haree direta evidénsia hirak ne’ebé Diresaun Servisu Investigasaun Kriminál rekolla iha terrenu.
Komandu Jerál PNTL mós fó orientasaun atu buka tuir nafatin fatin balun ne’ebé rai osan falsu sira ne’e.
Nune’e Komandante jerál PNTL Komisáriu Asistente Afonso dos Santos no Segundu Komandante jerál, Komisária Asistente Natercia Eufrazia Martins fó apresiasaun ba servisu DSIC nian ne’ebé bele asegura osan falsu ho montante boot.
Reportájen: Estefánia Cardoso
Foto: Estefánia Cardoso