Díli, 15 Setembru 2026 (Média Democracia) – Programa Wolbachia ne’ebé Governu, liuhusi Ministériu Saúde (MS), hamutuk ho Menzies Timor-Leste (TL), implementa iha Munisípiu Díli, to’o ona 80%. Rezultadu ne’e konsidera hanesan progresu di’ak iha esforsu prevensaun moras dengue iha Timor-Leste.
Tuir Vise-Ministru Saúde ba Fortalesimentu Institusionál, José Mango dos Reis, hatete katak implementasaun programa Wolbachia iha Munisípiu Díli to’o ona 80%, no Governu konsidera posibilidade atu espande programa ne’e ba munisípiu sira seluk, liuliu sira ne’ebé nivel rezisténsia ba moras dengue aas.
“Konaba progresu programa Wolbachia, tuir informasaun ne’ebé ha’u hetan ohin, nia to’o ona 80%. Ida-ne’e persentajen ida ne’ebé di’ak. Esforsu hotu-hotu ne’ebé ita halo ho estratéjia oioin, inklui programa sira seluk, importante atu prevene situasaun ne’e hodi la sai grave liután,” dehan José Mango dos Reis ba jornalista sira iha Novo Turismo, Tersa-feira (15/09).
Nia hatete persentajen 80% ne’e hatudu progresu pozitivu no espera katak programa ne’e bele fó rezultadu di’ak iha tinan sira tuirmai.
“La iha Governu ka Estadu ida ne’ebé hanoin atu halo buat ruma hodi estraga nia povu, tanba povu mak ita hotu. Bainhira ita halo buat ruma ne’ebé di’ak, ita proteje ita-nia an rasik,” nia dehan.
Vise-Ministru ne’e afirma rezultadu 80% ne’e hetan husi implementasaun projetu pilotu iha Munisípiu Díli, ne’ebé Governu implementa hamutuk ho parseiru sira, ho objetivu atu ajuda hamenus no kontrola moras dengue iha Timor-Leste.
“Ita espera katak, maski agora implementa iha Díli de’it, rezultadu ne’ebé ita haree di’ak ne’e presiza atu espande tan ba munisípiu seluk. Menzies hamutuk ho Governu Timor-Leste, iha futuru, bele espande programa ne’e ba munisípiu sira ne’ebé nivel rezisténsia ba moras dengue aas,” nia konklui.
Molok ne’e, Governu liuhusi Ministériu Saúde, hamutuk ho Menzies Timor-Leste, lansa programa Wolbachia iha Timor-Leste, hanesan parte husi esforsu atu prevene no kontrola moras dengue.
Reportajen: Octaviana da Costa
Foto: Octaviana da Costa