DILI, 30 Maiu 2026 (Media Democracia)– Grupu kandidatu ba konkursu Ofisiál Justisa Defensória Públika kestiona irregularidade iha prosesu seleksaun no husu Konsellu Superior atu anula rezultadu ne’ebé publika ona Sira konsidera prosesu ne’e viola Artigu 30 Estatutu Ofisiál Justisa
Tuir reprezentante kandidatu Gabriel Soares da Silva hateten, Artigu 30 defini katak se de’it mak atu konkore vaga tenke liu husi faze tolu hanesan, seleksaun dokumentu, prova eskrita, no prova oral, faze hirak ne’e atu justifika no avalia kle’an kandidatu nia koñesimentu.
“Se de’it mak atu konkore vaga ida ne’e tenke liu husi seleksaun dokumentus, prova eskrita alende ne’e mós prova oral, hafoin mak haree sé mak liu, sé mak la liu vaga ne’e, loke iha 14 Outubru 2025, seleksaun dokumentu remata iha 15 Janeiru 2026, iha 2026, prosesu kontinua ba faze tuir mai, ami deteta problema bainhira na’in sanulu (10) ne’ebé daudaun servisu nu’udar Ofisiál Justisa temporáriu mós partisipa iha seleksaun dokumentu no aprova iha eskrita”. Dehan kandidatu Gabriel Soares, iha Jardim 5 de Maiu, (29/05/26).
Nia deklara na’in10 ne’ebé daudaun servisu nu’udar Ofisiál Justisa temporáriu mós liu seleksaun dokumentu no aprova iha eskrita, maibé iha faze finál, prova eskrita ne’e na’in sanulu laiha, alende mai to’o iha prova oral, tanba ne’e konsidera ne’e viola estatutu.
“situasaun ne’e ami konsidera viola Dekretu Lei 19/2012, 25 Abril, liuliu Artigu 6 kona-ba Rejime Ofisiál Justisa, sira mós kontra Artigu 30 no Artigu 17 ne’ebé ko’alia kona-ba Ofisiál temporáriu, tuir Artigu 17, ofisiál temporáriu tenke servisu durante tinan ida de’it no hetan avaliasaun dezempeñu, la’ós admitidu direta ba formasaun, Ofisiál temporáriu sira ne’e maka servisu ka kontribui Defensória Repúblika durasaun tinan ida bele hetan avaliasaun dezempeñu ho valór ida laiha artigu ida dehan sira bele admite ba formasaun sein kriteira,” nia esplika
Iha fatin hanesan kandidatu Elvino R.X das Neves argumenta vaga ne’e konkursu públiku, la’ós konkursu internu tanba ne’e, Ofisiál temporáriu sira tenke tuir regra hanesan kandidatu seluk.
“Ami nia ezijénsia mak ne’e, di’ak liu anula tiha vaga total, loke fali konkursu foun hodi ema hotu hotu bele konkore se lae, futuru mai sira ne’ebé lidera iha Instituisaun Defensória Públika bele hatama de’it sira nia ema iha laran, signifika katak sira na’in sanulu ne’e hanesan mate klamar ida derepente mosu iha ema sira seluk durante sakrifika sira nia vontade nia esforsu hodi tes vaga ida ne’e, ami konsege hatama ona karta reklamasaun ba Konsellu Superior Defensória Públika semana kotuk data 18 ne’e maibé to’o agora desizaun kona ba reklamasaun ne’e la bazeia ba lei no la proteje kandidatu sira nia direitu
Kandidatu sira husu mós ba Ministru Justisa, Parlamentu Nasionál Komisaun A, no Primeiru Ministru atu intervén ba kazu ne’e hodi garante justisa no transparénsia iha asesu ba funsaun públika
Reportajen : Julia
Foto : Julia