Dili, 05 Fevereiru 2026 (Média Democracia) – Komandu Polisia Nasionál Timor-Leste (PNTL) hamutuk Ministeriu Interior no Sekretária Estadu Terras Propriedade realiza enkontru konjunta hodi diskute kona-ba atribuisaun rai ba Komandu PNTL hodi konstrui edifisiu Komandu Munispiu, Eskudra kazerna ba membru PNTL inklui Postu Polisia.
Komandante Jeral PNTL Komisariu Jeral Polisia Henrique da Costa hateten, ohin realiza enkontru envolve Komandu Munisipiu sira, no nia Administrasaun reprezentante sira, unidade nomos Komandu Jerál rasik no marka prezensa mós husi Ministériu Interior no Terras propriedade, hodi haree liu kona-ba foti dadus ba rai sira, nune’e ba futuru hodi halo edifisiu eskuadra, Komandu Munisipiu, postu no kazerna ba polisia sira.
“Ita presiza Komandu Munisipiu sira fornese dadus ba ita. Nune’e ekipa Ministru nian no Terras Propriedade nian karik hetan ona dadus depois ba iha Munisipiu halo verifikasaun, hodi haree katak, medida rai ne’e sufisiente halo konstrusaun, ita mós presiza haree no indentifika keta fatin balu iha problema karik, depois ita halo kedas kordenasaun ho Terras Propriedades, nune’e bele hetan solusaun.” Dehan Komisariu Jeral Herique ba jornalista sira iha Sentru Formasaun Polisia Komoro kuarta (04/02)
Komisariu Jeral hatutan, Komandante Munisipiu no Komandante Unidade sira hamutuk ho teknik Ministériu Interior surfei ba postu no eskuadra sira hodi haree ba rai. Servisu balun mós lao ona hanesan eskuadra sira iha lore no ba iha hatulia.
Iha fatin Xefe Unidade Apoiu Tekniku Ministeriu Interiór Adino Soares Amaral hateten, kona-ba rai atribuisaun ne’e Ministeriu Interior halo kooperasaun ho PNTL, tanba sira mak nain ba projeitu, no implementadór projeitu ne’e husi Ministériu Interior.
“Agora daudauk implementa no kontratu ona eskuadra 15, falta 50 tan de’it para atu kompleta 65 iha Dili husi area Cristo Rei, Na’in Feto, Vera Cruz ho tipe A.” Dehan Xefe Unidade Apoiu Tekniku Ministeriu Interiór Adino Soares Amaral
Xefe Unidade Apoiu Tekniku Ministeriu Interiór hatutan, servisu Ministeriu Interior nian mak hahu muda projetu kazerna husi postu mai munisípiu no kontinua mai nasional.
Nune’e ita hadia husi kraik mak sae mai, Aleinde ne’e planu tinan ne’e tenke to’o 62 kazerna ho tan eskuadra 50, no orsamentu refere bazea ba lei foun husi aprovizionamentu. Tanba labele tama iha Konsellu Administrasaun Fundu Infraestutura.
Reportajen : Estefania
Foto : Estefania