Dili, 11 Juñu 2026 (Media Democracia)- Tribunál Judisiál Primeira Instánsia Dili (TJPID) liu husi despaixu ba iha prosesu primeiru interogatoriu, deside aplika medida Prizaun Preventiva (PP) ba arguidu na’in rua ho inisial JACR no MZX.
Arguidu na’in rua ne’e submete ba iha Tribunal tanba alegadamente envolve iha krime tolu ne’ebé hadau karteira iha Praia Dos Coquiros domingu (07/ 6) kalan ne’e hodi rezulta Nadine Ribeiro do Carmo lakon vida, no Euodia Agile do Carmo hetan kanek.
Ba kazu ne’ebé Arguidu nain rua envolve ne’e rejista ona ho NUK: 0602/26.PNSIK.
Nune’e Ministériu Públiku (MP) promove arguidu nain rua ho krime, Roubu ne’ebé previstu iha artigu 253, no krime Ofensa Neglijente ne’ebé previstu iha artigu 148, no krime Homesidu Neglijente previstu iha artigu 140 husi Kódigu Penál ne’ebé eziste iha Timor-Leste.
Tanba ne’e, iha despaxsu Tribunal nian liu husi Juiz Turnu Ivan Patrocenio deside aplika medida Prizaun Preventiva (PP) ba arguidu nain rua, tanba konsidera iha indisus forte ba krime ne’ebé Ministériu Públiku (MP) promove ba iha Tribunál.
Enkuantu iha alegasaun Ministériu Públiku (MP) ne’ebé reprezenta husi Prokuradór Turnu Aderito Tilman husu Tribunál atu aplika medida Prizaun Preventiva (PP) ba arguidu nain rua.
Embora husi parte defeza nian, Defensór Públiku Fernando de Carvalho husu Tribunal tetu, atu aplika medida ba arguidu nain rua.
Prosesu primeiru interogatoriu ne’e, prezide husi Juiz Turnu Ivan Patrocenio, Ministériu Públiku ne’ebé reprezenta husi Prokurador Aderito Tilman, iha ne’ebé arguidu na’in rua ne’e hetan asisténsia legal husi Defensór Públiku Fernando de Carvalho.
Hafoin desizaun, Polísia ezekuta despaixu Tribunál nian hodi lori arguidu na’in rua ba estabelesimentu Prizionál Becora hodi kumpre medida koasaun Prizaun Preventiva ne’ebé Tribunál deside ona liuhusi despaixu.
Reportajen : Estefania Cardoso
Foto : Estefania Cardoso