Baucau, 31 Janeiro (Média Democracia) – Maske moris la hanesan ho ema seluk ne’ebé sei iha inan-aman hodi sader-an hato’o terus no susar ba, maibé ne’e planu maromak nian, ne’e duni ita rasik tenke esforsu-an sai hanesan inan no aman ba ita-nia-an rasik no ba alin sira, nune’e desidi buka servisu hodi sustenta ba nesesidade loron-loron no haruka alin sira ba eskola.
Carmelinda Rosa da Costa ho idade (25) husi Aldeia Boilé Suku Bahú Postu-Administrativu Baucau no maun-alin hamutuk nain ne’e (6), nia hanesan feto boot iha uma laran.
Carmelinda Rosa da Costa hateten, hili dalan servisu ho idade ne’ebé ki’ik tanba inan aman mate hotu ona no husik hela sira, nu’udar feto boot iha uma laran hodi foti desizaun atu buka osan hodi sustenta ba familia no alin sira nia presiza.
“Ha’u hili dalan servisu ho idade ne’ebé ki’ik tanba ha’u nia inan aman mate hotu ona no husik hela ami na’in 6, ha’u nu’udar feto boot iha uma laran maske maun na’in rua sei iha, maibe ha’u foti desizaun atu buka osan hodi sustenta ha’u nia familia no alin sira nia presiza.” Dehan Carmelinda via whatsApp
Nia hateten tan katak durante servisu nia mós tuir tan kursu lian englis tanba nia sente ho salariu 120 dolar ne’e la to’o atu uza ba moris loron ho nune’e nia esforsu-an hodi fahe tempu atu tuir kursu lian englis.
“Ha’u servisu maibe ha’u mós kontinua ha’u nia kursu lian englis, ha’u tenke fahe tempu ba servisu no kursu nian tanba ho salariu ne’ebé fulan ha’u simu 120 dolar ha’u fahe ba fulan ida nian la to’o no iha servisu fatin ami remata servisu iha oras 10 kalan no tenke lao ain ba uma maske distansia dook oituan.” Dehan nia
Nia afirma durante osan laiha nia empresta ema nia osan hodi fó ba nia alin sira hodi ba eskola tanba lakoi nia alin sira atu hakotu eskola iha dalan klaran maibé nia hakarak haree nia alin sira nia susesu.
Esplika liután, osan ne’ebé kada fulan nia simu $120 dolar nia gastu ba uma laran no ba alin nia eskola tanba nia hakarak alin sira tenke susesu iha sira nia eskola no husi susesu ne’ebé alin sira atinje bele halo nia kontenti no inan aman mós kontente maske la hamutuk ho sira.
Reportajen : Nelia
Foto : Via whatsApp Carmelinda