Liquiça 08 Dezembru 2025 (Média Democracia) – Komunikadu Imprensa Prezidénsia Repúblika, iha kolaborasaun ho Ministériu relevante husi IX Governu Konstitusionál no Munisípiu Liquiça, sai uma-na’in ba semináriu ho títulu “Unidade Nasionál Garante Sustentabilidade Estadu no Nasaun nian.” Eventu ida-ne’e halo parte iha siklu refletivu ida ne’ebé marka aniversáriu ba dala 50 invazaun nian. Komunikadu ne’e Média Democracia asesu husi pajina PR Segunda semana ne’e.
Prezidente dehan, iha komunikadu sorumutu loron rua ne’e hala’o iha Suku Vatuboro, Loes, Munisípiu Liquiça, fatin ne’ebé iha signifikadu istóriku ne’ebé kle’an. Husi tinan 1975 to’o 1979, baze rezisténsia Fronteira Norte iha Loes kompostu husi kompañia xave haat, Kompañia Bubu Api iha Vatuboro, Kompañia Tata Bei iha Gugleur, Kompañia Manus iha Guiço, Kompañia Magarapo iha Lisadilla no Kompañia Ramhana iha Tatabei. Kompañia Ramhana notavelmente inklui membru sira husi Manatuto, Baucau, Lospalos no Viqueque.
“Loron dahuluk, 6 Dezembru, foka liubá komunidade no komemorasaun. Atividade sira inklui serimónia kuda ai-oan, Santa Missa hodi hanoin hikas Herói Nasionál sira, no kompetisaun desportu tradisionál. Loron ne’e konklui ho divertimentu muzikál ne’ebé selebra kultura Timoroan no memória kolektiva.” Dehan Prezidente da Repúblika José Ramos-Horta
Prezidente afirma, iha loron 7 Dezembru dedika ba reflesaun kle’an kona-ba nasaun nia pasadu no futuru. Prezidente Ramos-Horta prezide sesaun abertura, hodi subliña legadu duradoura luta nian.
“Ita-nia unidade harii liuhusi sakrifísiu komún. Ida-ne’e mak fundasaun sólidu ba sustentabilidade ita-nia Estadu no futuru prósperu ita-nia Nasaun.” Afirma Prezidente Repúblika
Konsellu Munisipál Kombatentes Libertasaun Nasionál (CMCLN) Liquiçá aprezenta Eis Komandante no Kombatente sira husi kompañia Bubu Api, Tata-Bei, Manus, no Lisadilla. Loron ne’e mós fó atensaun ba solidariedade komunitária, ho distribuisaun parcel Natál ba família 150 husi suku tolu iha Loes, Munisípiu Liquiça. Iha kalan sei fosai dokumentáriu istóriku tinan 1975 nian husi Arkivu no Muzeu Rezisténsia Timorense (AMRT), no remata ho konsertu.
Esplika liután relasiona ho eventu reflesaun ne’e halibur memória solene ho atividade kulturál hodi hametin ligasaun komunidade no espíritu reziliénsia nasionál. Aleinde ne’e halo Reflesaun ba aniversáriu 50 hanesan omenajen ida ba pasadu no kompromisu foun ida ba futuru ida ne’ebé unidu.
Reportajen : Nelfiano
Foto : Media PR