Dili, 10 Setembru 2026 (Media Democracia) – Misa Solene ba transladasaun no sepultamentu restos mortais Preladus Na’in-Haat konvida komunidade fiéis atu reflete kona-ba fragilidade no mortalidade umana, sentidu moris no responsabilidade atu husik legadu di’ak ba gerasaun sira tuir mai.
Iha homilia, Arsebispu Metropolitanu Dili, Dom Virgílio Cardeál do Carmo da Silva, hatete katak moris umanu iha natureza fízika ne’ebé limitadu no la’ós eternu. Ema hotu sei hasoru finitude no, iha loron ikus, sei fila fali ba rai. Tanba ne’e, realidade mortalidade tenke sai oportunidade ba ema atu reflete kle’an kona-ba sentidu no objetivu moris.
Mensajen ne’e mos hatudu katak ema labele moris de’it ba an rasik, maibé tenke konsidera ema seluk no buat di’ak sira ne’ebé bele husik ba gerasaun sira tuir mai.
“Viver para deixar legado” sai hanesan prinsipiu importante iha reflexaun ne’e, tanba valor moris ema ida la’ós de’it iha tempu nia moris, maibé mos iha buat di’ak ne’ebé nia husik hela ba ema seluk, dehan Arsebispu Metropolitanu Dili.dehan Arsebispu Metropolitanu Dili, Dom Virgílio Cardeál do Carmo da Silva
Legadu ne’e bele iha forma espiritual, hanorin, esperansa, karidade, hahalok di’ak no servisu ba komunidade. Liuhusi buat hirak ne’e, gerasaun sira tuir mai bele kontinua liman-rohan ne’ebé gerasaun uluk husik hela.
Igreja mos konvida fiéis sira atu aprende husi realidade mortalidade, hodi hamenus arrogánsia no vaidade, no hametin respeitu, konsiderasaun no solidariedade entre ema sira ne’ebé moris hamutuk.
“Loron ida ita sei la iha ona, no buat hotu ne’ebé ita halibur sei husik ba ema seluk,” mensajen hosi homilia ne’e hatudu, hodi bolu ema hotu atu konsidera saida mak sei kontinua depois de nia mate.”nia dehan
Iha kontestu ne’e, restos mortais Preladus Na’in-Haat ne’ebé sei sepulta iha rai-santu ida ne’e sai mós símbolu ida atu komprende fragilidade no finitude moris umana.
Preladus sira, durante sira-nia moris, dedika sira-nia energia, forsa, saúde no matenek ba misaun Igreja. Maski sira-nia moris fízika remata ona, legadu no ensinamentu ne’ebé sira husik hela sei kontinua iha komunidade no gerasaun sira tuir mai.
Misa Solene ne’e mos sai momentu asaun-de-grasa ba Maromak, tanba fiéis sira fó agradeseimentu ba Maromak nia domin, fidelidade no bensaun ne’ebé hatudu ba povu.
Igreja konvida komunidade atu lori valor sira hanesan domin, karidade, esperansa, respeitu no servisu ba ema seluk iha moris loroloron, nune’e legadu di’ak bele kontinua hosi gerasaun ida ba gerasaun seluk.
Iha ikus, mensajen ne’e bolu ema hotu atu moris ho konsiénsia katak ita la moris ba ita-nia an rasik, maibé iha responsabilidade atu prepara no husik liman-rohan di’ak ba ema sira ne’ebé sei kontinua moris depois de ita.
Reportajen: Estefania Cardoso/Pedrito
Foto: Ume