Dili, 26 Maio 2026 (Media Democracia)- Konfederasaun Sindikatu Traballadór Timor-Leste (KSTL) realiza kongresu nasionál dahuluk ba traballadór ba Estabelesimentu Asosiasaun Ekonomia Traballadór Ekonómia Informál ho tema “Justisia Sosial no Ekonómia ba Traballadór sira Setór Ekonómia Informal”, atividade ne’e realiza duranmte loron rua, 25-26 Maiu 2026.
Tuir Prezidente Sindikatu Trabaladores Timor-Leste (KSTL), Almeiro Vila Nova hateten, kongresu ne’e nia objetivu mak atu fornese plataforma ba traballadór informál sira atu hetan rekoñesimentu, tanba durante ne’e sira marjinalizadu no vulnerável tebes ba risku ekonómiku no sosiál
“Kongresu ne’e sai inisiativa dahuluk hodi fó espasu ba traballadór ekonomia informál atu diskute estatutu asosiasaun no hili lideransa ne’ebé sei kontinua servi ba asosiasaun, traballadór ekonomia informál, tanba durante ne’e sente marjinalizadu no vulnerável tebes ba risku ekonómiku no sosiál bainhira akontese situasaun ekonómia, buat sira ne’e mak ita presiza organizasaun asosiasaun para hotu-hotu bele tau lian iha asosiasaun ne’e hodi lori aspirasaun ba halo negosiasaun ho Governu”. Dehan KSTL, Almeiro Vila Nova, (25/05/26).
Nia informa Partisipante iha kongresu ne’e hamutuk 110, kongresista mai husi Munisípiu sira hanesan, Dili, Aileu, Ermera no Liquiça, traballadores sira ne’e mai husi setór oioin, hanesan fa’an sasan iha dalan ninin, loke kios, servisu iha to’os, fa’an nu’u no atividade seluk tan.
“Dadus hatudu katak setór informál iha Timor-Leste boot tebes, tuir Labor Force Survey ILO tinan 2021, setór informál okupa 76%, iha 2026, númeru ne’e sa’e ba 82%, enkuantu setór formál iha de’it 18%, setór informál ne’ebé boot ne’e la’ós dezafiu ka obstákulu, maibé ne’e hanesan oportunidade ba ita par oinsá empodera sira hodi nune’e sira nia negósiu bele sai boot no bele kontribui ba dezenvolvimentu ekonómia iha ita nia rai
Kongresu nasionál ne’e hetan apoiu másimu husi ILO, ne’ebé la’ós de’it suporta kongresu maibé mós programa organizasaun grupu traballadór informál iha Munispiu Dili no Aileu, Atividade loron rua ne’e gasta osan 6500 hodi responde ba nesesidade kongresu nian.
Reportajen : Juliana/Leozalia
foto : Leozalia