Dili 26 Maiu 2026 (Media Democracia)- Ministeriu Defeza sei halo instalasaun ba ospitál militár ne’ebé tinan kotuk asina ona, protokolu konstrusaun entre Xina ho Timor-Leste tinan ne’e sei hahú nia proseau konstrusaun.
Tuir Ministru Defeza Kontra-Almirante, Donaciano da Costa Gomes “Pedro Klamara Fuik” hatete instalasaun ba ospitál militár ne’ebé tinan kotuk asina ona.
“Hanesan ita-boot sira hatene katak instalasaun ba ospitál de amizade Xina no Timor-Leste ka bolu dehan ospitál militár ne’ebé maka ita asina de protokolu da konstrusaun iha tinan kotuk, hanesan ha’u hatete bebeik Tinan ida ne’e komesa nia prosesu konstrusaun, bainrua hanesan ne’e tékniku sira to’o iha ne’e.” Dehan Pedro Klamar Fuik ba jornalista sira Ministériu Finansas Aitarak-Laran Tersa ne’e
Donaciano informa, tékniku sira husi Xina ne’e mai hamutuk na’in 10 no sei hela durante fulan ida hodi halo estudu nune’e bele hahú dezeñu.
“Ne’ebé sira prepera dezeñu sei konsulta ko’alia ho ita-nia governu, ho tékniku balun sira tan ne’ebé mak presiza para depois defini modelu, defini estrutura kondisoins hotu-hotu ne’ebé presiza ba iha ospitál ne’e, depois kuandu dezeñu, sira fila ho ona dezeña ne’ebé preparadu para depois bele lori ba para sira halo desizaun bainhira mak komesa konstroi.” Nia afirma
Nia dehan ospitál Militár ne’e doasaun husi parte governu Xines mai governu Timor-Leste ka bele dehan husi povu Xines ba povu iha Timor-Leste.
Governante ne’e garante katak tinan ne’e sei inísia konstrusaun ba ospitál militár ne’e no sei inaugura iha tinan 2027, tarde liu tinan 2028.
Entretantu resintu ne’ebé sei halo konstrusaun ba ne’e hanesan resintu Militár Defeza nian, iha mós reklamasaun husi imdividu balun maibé nia parte hatete katak sei bele rezolve tanba Ospitál Militar ne’e sei konstroi ba ema barak nia di’ak no hakarak.
Reportájen: Estefánia Cardoso
Foto: Estefánia Cardoso