Aileu, 03 Fevereiru (Média Democracia) – Ministeriu Defeza hamutuk ho Institutu Defeza Nasional, ho FALINTIL Forsa Defesa Timor-Leste (F-FDTL), ofisialmente inaugura edifísiu foun Akademia Militar Konjunta no halo lansamentu website ofisiál Insititutu Universitario Defeza Nasional (IUDN) iha Area Hundolte, Aldeia Bandera hun, Suku Liu Rai, Postu Aileu vila, Munisípiu Aileu.
Diretór Institutu Defeza Nasional (IDN), Nuno Corvelo Sarmento hateten, eventu ne’e iha valor istóriku, institusionál no nasionál ne’ebé aas, tanba marka kontinuidade dalan husi luta rezisténsia armada ba konsolidasaun Estadu-Demokrátiku.
“Eventu komemorativu ohin hala’o ho enkuadramentu prinsipál tolu, hanesan, inagurasaun edifísiu foun ba servisu formasaun no hanoin estratéjiku, lansamentu website ofisiál Akademia Militar Konjunta, no komemorasaun tinan 25 Transformasaun FALINTIL nu’udar forsa rezisténsia armada ba F-FDTL hanesan forsa regulár Estadu nian.” Dehan Diretór Institutu Defeza Nasional (IDN), Nuno Corvelo Sarmento liuhusi diskursu, iha edifsiu akademia militar segunda (02/02)
Komemorasaun tinan 25 ne’e fó oportunidade atu reflete momentu desizivu ida iha istória kontemporánea Timor-Leste, tanba FALINTIL, hanesan pilár militár iha luta ba libertasaun nasionál, no nia transformasaun ba F-FDTL simboliza pas husi rezisténsia armada ba forsa nasionál ida-ne’ebé profisionál, dixiplinadu, konstitusionál no subordinadu ba poder polítiku demokrátiku.
Diretór Institutu Defeza Nasional (IDN) haktuir, Munisípiu Aileu koñese nu’udár sentru importante iha istória rezisténsia armada no seguransa nasional.
“Ohin loron, Aileu simboliza ligasaun istórika entre luta ba independénsia no esforsu kontinua atu konsolida Estadu.” Haktuir Diretór Institutu Defeza Nasional (IDN)
Enkuantu, Inagurasaun edifísiu foun no lansamentu website Akademia Militar Konjunta reprezenta investimentu estratéjiku Estadu nian iha área formasaun, koñesimentu no hanoin estratéjiku, hanesan base fundamental ba defeza nasional, ho componente ida dijitalizadu moderno, liuhusi aplikasaun (Smart Education System/SES).
“Akademia ne’e sei prepara kuadru Militar, Polisial no Sivíl sira atu hasoru dezafiu seguransa kontemporánea, estabilidade nasional, rejionál no internasional, hodi asegura dezenvolvimentu ida produtivu no sustentável ba longo prazo.” Afirma Diretór Institutu Defeza Nasional (IDN), Nuno Corvelo Sarmento
Molok remata diskursu, Diretór IDN hato’o agradesimento ba Prezidente Repúblika, Governu, Parlamentu Nasional no parseiru internasionál sira, tanba apoiu kontinua ba dezenvolvimentu no hametin instituisaun Defeza Timor-Leste nian.
Diretór IDN subliña, Akademia Militar Konjunta sei fó kontribuisaun signifikativa ba formasaun lider no kuadru superiór F-FDTL no PNTL, inklui partisipante sivíl sira. Akademia ne’e sei akomoda estudante to’o ema 120, liuhusi prosesu konkursu públiku ne’ebé halao husi Ministériu Defeza.
Diretór hatutan katak, konstrusaun edifísiu uza orsamentu aproximadu $3 miliãun, ho fasilidade modernu sira, inklui dormitóriu. Prosesu konstrusaun hahu iha fulan Setembru 2025 no tuir planu sei remata iha fulan Fevereiru 2026.
Inagurasaun ne’e realiza iha momentu istóriku ida, hanesan parte husi komemorasaun dala-25 Transformasaun FALINTIL ba F-FDTL, ne’ebé selebra iha loron 2 Fevereiru 2026, no konsidera hanesan marku importante iha prosesu konsolidasaun soberania, integridade teritoriál no defeza nasional Estadu-Nasaun.
Hari Akademia Militar Konjunta laós deit projetu dezenvolvimentu militár, maibé mós hanesan forma ida atu valoriza no preserva istória rezisténsia nasional. Área Aileu iha valor istóriku boot tanba sai fatin importante iha kriasaun FALINTIL iha tinan 1975 no prosesu akantonamentu iha tinan 1999, hafoin remata funu.
Hari Akademia Militar Konjunta sei fó benefísiu signifikativu ba Estadu-Nasaun, tanba hametin kapasidade operasional no planeamentu estratéjiku F-FDTL, kontribui ba seguransa nasional no rejionál, no global, no hametin relasaun di’ak entre Forsa Defeza no komunidade. Inisiativa ne’e mós fó oportunidade ekonomika no sosiál ba komunidade lokál iha Munisípiu Aileu.
Nia konsidera, inagurasaun Akademia Militar Konjunta iha Hundolte hanesan desizaun estratéjika tuir interese nasional, ne’ebé reflete kontinuidade istórika rezisténsia no kompromisu nasional atu harii Forsa Defeza modernu, profisionál no responsavel ba dame, estabilidade no unidade nasional Timor-Leste.
Iha fatin hanesan, Xefe Estadu Maior Jeneral Forsa Armada, Tenente Jeneral, Falur Rate Laek hatutan, Aileu la’ós fatin insignifikante iha narativu istóriku.
“Aileu mak rai ne’ebé FALINTIL moris, ne’ebé ami hasoru ho tenasidade, no ami nia identidade nu’udar forsa libertasaun. Aileu mós mak rai ne’ebé ami transforma forsa rezisténsia ne’ebá iha instituisaun defeza modernu.” Dehan Xefe Estadu Maior Jeneral Forsa Armada, Tenente Jeneral, Falur Rate Laek
Ohin loron, iha Aileu Akademia Militar tur, simbolikamente ligadu ba pasadu gloriosu rezisténsia ba futuru profesionalizmu ne’ebé la iha duvida. Ne’e la’ós koinxiénsia superfiisial, nia mak kontinuasaun istóriku profundi no intenzional.
Xefe Estadu Maior Jeneral Forsa Armada afirma, eskola Akademia Militar marka inísiu siklu permanente no regular rekonsimentu institusional. Medallu sira ne’ebé fó ohin loron simboliza justisa no rekoñesimentu ne’ebé dignu. Ne’e prosesu ne’ebé sei kontinua no sai institusional ho objetivu klaru.
“Ha’u halo apelasaun espesial ba família personál Militar sira. Imi mak baze invisivel maibé la substituiível ba forsa institusional. Bainhira imi nia oan, mane, no feen sira ba halo misaun difisil iha territóriu perigozu no kondisaun desafiante, mak imi nia apoiu moral ne’ebé la makas, imi nia sakrifísiu konxiente maibé silensiozu, imi nia domin amor ne’ebé la iha duvida, mak sustenta sira no fó korajen.” Afirma Xefe Estadu Maior Jeneral Forsa Armada
Purtantu, Ministru Defeza, Kontra Almirante, Donanciano Costa Gomes hateten, inagurasaun akademia militar konjunta nu’udar komprimisiu ba defeza modernu, integrada no aumentada ba iha futuru.Tanba ne’e, Akademia Militar reprezenta infrastrutura modernu ne’ebé hola parte iha vizaun hodi kria forsa profisional, kapas no signifikadu ne’ebé transforma diferentes estudu no diferentes kompleksidade atu sai forsa ne’ebé koezaun no profisional iha futuru hodi ba servisu seguransa nasional hodi garante paz no estabilidade iha nasaun.
Durante tinan 25 ita-nia militar frekuente esperensias ho militar sira husi nasaun oi-oin, tanba ne’e ho Akademia Militar konjunta ida ne’e bele eleva sira-nia kapasidade intektual hodi hamutuk prevene krime sira iha futuru. Entretantu konstrusaun edifisiu Akademia Militar konjunta, konstrui hahu hatur fatuk dahuluk iha loron 30 fulan Agostu tinan 2025 ne’ebé konstrui husi Empreza Xineza ho valor orsamentu $3 milloes.
Reportajen : Estefania
Foto : Estefania